Dr letst Tag Arbeit steit vor üs. Mir hinis am haubi nüni wieder mit de drüü Leiter troffe, mit ihne simer hinger ufem Ahhänger dr Berg uf gfahre. Mit de Rächeli, Picku u Schniidwärkzüg si mir loszoge. Mir hätte i zwöiier Gruppe söue schaffe, hi aber när uf d Taktik gwächslet, ds dii zwü  vorderste aues mache u sächs angeri hinger nache luufe. Ds het de oh ganz guet klappet, mir sii eifach nüm ganz sklo schnäu ungerwägs gsii. Langsam aber sicher hisech auii abem Lehrer ufgregt, wo e grosse Putzwahn het entwicklet i dere Wuche. Überau hets ghisse:" Da liigt no e Tannezapfe, lisisch dä no zäme!" oder " die Steine ghöre nid uf de Wäg, rumsch ds no furt?!" Bimne schön aute Hüüsli hii mir de e chlini Pouse gmacht u oh no Föteli gmacht. Wiiter abwärts hets nümme so viu z'düe gä. D Motivation für ds Putze isch geng chliiner worde, u für ds Trottinetle geng grösser. Mite Gondeli sii mir de ueche gfahre u hii dert Zmittag gässe. Auii hisech es Trottinet u Heum gschnappet u hii füre Verkehrsverein posiert. I Gruppe si mir eh chlini Strecki achegfahre, wo de dr Simon nach 10 Meter isch umghiit u sini ganzi Hang offe het gha. Nach dr Glace wo es Paari si ga chuufe isches de oh scho los gange. Am Ahfang hetme zimlech viu über Kies müesse fahre. Nachemne Zytli isch de Asphalt cho u es het zimlech viu Schlaglöcher gha. Dii Schnäue si mit Herr Kipfer vor us. Me het zimlech viu müesse brämse u wos de dr Herr Kipfer het abem Trotti gjagt, hetme eher weniger mit dr Vorderbräms brämset. Nach dere eher churze, aber schnäue Piste hii mir no id Badi dörfe. Dasmau isch dr Rückwärtssalto nume no bim Elias güebt worde. Äs isch e hingertsi Chöpfler entsange, het aber gliich sehr elegant usgseh. Nachere Glace, wonis spändiert isch worde, hetme de no ä schöne Giu gseh. Wimes sechs cha däiche hetme de nachem Nummero wöue frage. Äs isch aber näre aune z unpersönlech gsii wemä mitem Google Übersetzer hät mit ihm kommuniziert. Auso het d Jasmin nach lange Zwiifle ä Serviette mit iherm Nummero druffe, zuenim bracht. Update: är het geng no nid gschribe :( 

Ir Turnhaue zrugg ischme afah mau ga dusche nach dem strenge Tag.  Zum Znacht hets Härdöpfu Gratin gä u d Tischmaniere sii i dere Wuche vo Tag zu Tag meh verschwunde. 

Äs isch scho dr viert Tag im Ungerwallis u mir sii ir Turnhaue gweckt worde wüu si het müesse putzt wärde. Auso hets gheisse: "Ueche ga Zmorge ässe u när ga Matte verruume." Äs isch wiiter gange am Vitaparcour. Mir hinis i zwüü Gruppe ihteut u si zimlech schäu vorwärts cho. Äs isch zähnii gsii wo jedes Ästli vom Bode gfägt isch gsii. Dr Patrice het zwar eigentlech eh ganze Tag planet. Auii hisech gfröit u z gfüu gha me chönn ize e freie Namiitag ergattere. Da isch auerdings nüüt drus worde, wüu Herr Kipfer am Patrice ahglüte het u gfragt für me Arbeit. Dermiit sii auerdings nid auii glüklech gsii. Nachem Zmittag bim Schuuhus, si mir ine angere Teu vo Salvan veiechli wiit ueche gfahre. Dr Patrice, dr Emanuel u dr Thierry hii üs mit ueche gno u dii einti Gruppe dobe mit Wärchzüüg lah stah, mit dr Ahwiisig, mir söue bis zure Alp dr Wanderweg sübere. Ds isch de meh oder minger gmacht worde. Näbebii sii ab und zue es paar Büüm gfäut worde mitmne Schnittwärchzüüg. Im Grosse u Ganze wärs e shöni Wanderig düre Waud, wemä nid gd unbedingt müesst Wanderwäge pflege.

Wo de di zwöiti Gruppe het Ross endteckt, sii dii zwüü vo Simone, Livia, Jana, Melanie u Jasmin gritte worde. 

Bim Verabschide vo Emanuel, Patrice u Thierry, isch ar Klass ire meist bruucht französisch Satz zum Iisatz cho. Nämlech: Je suis fatigué..! Dä isch di Wuche scho es paar Mau gsiit worde. Churz vor Nachtruhe si d Melanie, Simone u Jasmin mit de zwe Giele wo ir Turnhaue hii Sport gmacht ga rede. Mit Google Übersetzer isch de einigermasse gange. Mir hi chli mitne blöd da u itze himer ires Nummero. Uf au Fäu hisi de wöue ga u hi d Flip Flop mit i Gang usegno, so ds mir hii gmiint di hige die itze mitgno. Ir Nacht hätte d Giele u es paar Modi wöue e Nachtwanderig mache u sech useschliiche. Dr Plan wär gsii sech am haubi 1 use ufe Schuuhusplatz ga träffe. Am haubi eufi sii aui iz Bett u bide Miitli isch no dr Schoggichueche gässe worde u de schliesslech no d Gummibäre. Iigschlafe sii de aui ufenang obe,was ab und zue zure lustige Konfrontation het gfüert. Herr Kipfer het aber trotz de dicke Wäng u üsem uffäuige Verhaute vermuetet ds mir öpis vor hii. Auso isch er am föif vor haubi 1 id Zimmer vode Giele u Miitli cho luege ob mir no wach sii. Äs sii jedoch auii ruhig im Bett gläge u er isch umsüsch extra ufgstange. Bide Miitli het dr Wecker no hurti müesse abgsteut wärde wonis hät söue wecke. Um iis Haar hät dr Wecker glüütet u es wäre auii wach gsii. Mir his de lahsi mit dr Nachtwanderig. 

Am Ziisschti Morge hii mir üs wieder mitem Patrice troffe u hinis i mehreri Gruppe ihteut. Drei Gruppe hi ufem ganze Wanderwäg Schnitzu verteut mitere Motorgarrette. D Ziit isch sehr schnäu verbii u mir si zrügg zur Turnhaue ga Zmittag ässe. Nach dr Sterkig het ono dr Vitaparcour gmacht müesse wärde. Leider ohni Motivation u Müedigkeit hii mir no bis am haubi drüü gwärchet. Mit chli meh Motivation si mir de no id Badi uf Marécottes. D Simone u dr Jan hii mit dr Hiuf vo Silvano u Jasmin dr Backflip vrsuecht, wo zum Teu lustigi Sprüng si entstange. Nachere Glace sii auii wieder zrügg zur Turnhaue. Aa däm Aabe hii mir dörfe ir Turnhaue schlafe u wimes scho hätt chönne däiche, hii mir oh die Nacht eher weniger gschlafe. Wüu du es Paar hii Hunger übercho sisi ga di haubi Chuchi ufe Chopf steue, uf dr Suechi nach Ässe. Wosi de sii fündig worde, hii oh dii angere, wo eigentech uf dr Matte ir Haue hätte friedlech vor sech häre trüümt, nümme Ruhe gha. "Experiment Tüüfschlaf" isch gstartet worde. Wo si de es paar Bäu hii ab übercho hi dii meiste nümme gschlafe. 

Wie vilech scho erwähnt si im ganze Schuuhus u ir Turnhaue Liecht Sensore. Wo de öpe am haubi 1 ir Nacht so eine isch ahgange, sii di Nachtaktive sofort gflüchtet, wüume het gwüsst ds dr Lehrer ir Nacht weniger Spass versteit.  Mä isch de gliich verwütscht worde.

Am Mänti Morge sii mir am sibni gweckt worde u ä Stung speter losglüffe ah üse Arbeitsort wonis dr Patrice scho erwartet het. Aus erschts hiimer dr Wanderweg grächelet, dses het usgseh aus wärs gstoubsugeret. D Stägene hetme de no müesse vomm Härd befreie u de isch oh scho glii Mittag gsii. Am Nami hetme de plötzlech söue gäg ueche luufendi Wassergräbe mache, wome de när de mitem Lehrer diskutiert het ob äch ds göng oder nid...! Gäg dii Föife si mir ume zrugg bir Ungerkunft gsii. Nachem Znacht hei mir ä Gmeinschaftsaabe gmacht u d Lara het sogar no chönne bide Wäutsche Volleybau spiele. Am haubi eufi si mir auii ide Zimmer gsii u hätte söue schlafe. ABER...mir wäre ja nid üsi Klass we mir denn scho hätte gschlafe...! Auso isch de Miitli d Idee cho, zu de Giele übere z gaa. Nach mängem Versuech wo nie het klappet wäg dem blöde Liecht wo ä Sensor het gha, isch de plötzlech öper ufem Sofa glandet, da dr Lehrer nümme so z'fride isch gsii. U so isch de när Ruhe gsii. 

Let‘s go...! Am Sunnti Namitag isch d 152b i Zug gstige nach Salvan. Nachdem d Giele z Konufinge fasch nid wäre usgstiige, u mir e chli es Cabaret mit dr Guffere hii gha wome nid het chönne röuele, si mir doch de no im chliine, idyllische Bergdörfli im Ungerwallis ahcho. Aus erschts het natürlech aus müesse besichtigt wärde. Nachdem mir auii d Zivilschutzahlag hi gseh u gschmöckt, sii mir auii chli gschockt gsii. Drfür isch d Turnhaue näbedran umso schöner, sogar mit rosarote Garderobe, was d Miitli bsungers het gfröit. De isch glii oh scho ds Znacht nache gsii. Am Aabe hii auii zäme no chli Unihockey gspiut. Drufabe sii de auii i ihrer füechte Bett ga schlafe.